منتديات الترتر اون لاين
مرحباً بالزائر الكريم،،،

اذا لم تكن مسجَّلا بعد في منتديات الترتر اون لاين , نرجو اكرامنا بالتسجيل و الانضمام الى أكبر تجمع رقمي لابناء منطقة الترتر على الانترنت.
اذا كنت مسجلا فعلا, ارجو الدخول و عدم حرماننا من رؤية اسمك على قائمة الأعضاء

ولك وافر الشكر و الامتنان

أسرة منتديات الترتر اون لاين


حـــبـــابـــك عشرة يا زائر في منتديات الترتر اون لاين
 
الرئيسيةاليوميةس .و .جبحـثالتسجيلدخول

شاطر | 
 

 انفلونزا الصقور

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
زول هناك
عضو جديد
عضو جديد


عدد المساهمات : 9
الرتبة : 0
نقاط : 8729
تاريخ التسجيل : 16/10/2009

مُساهمةموضوع: انفلونزا الصقور   الثلاثاء نوفمبر 10, 2009 2:05 am

[center]
الاخوة اعضاء منتديات الترتر اون لاين
السلام عليكم و رحمة الله و بركاته

طبعاً كلنا سمعنا بي انفلونزا الطيور و انفلونزا الخنازير حمانا الله و ايكم

لكن في زول فيكم سمع بي انفلونزا الصقور ؟؟؟

كدي نشوف أعراضها كيف


أنفلونزا الصــــقور



(هاشم صديق)

عطسـة أولــى:

الحجـــوة:-

- حجيتكم ما بجيتكم

- خيرا ًجانا و جاكم

أكل عشانا

مصّ دمانا

فات خلانا

...................

- يازول ما تكتّر

قول الحجوة

ما دايرين الكفوة

محمد معانا

ما تغشانا

................

- سمح ......

اسمعوا

هي قونقوليسة

و عاملة منقة

شينة مرة

طار و لمة .

في كلامها

الخير علامة

وبالفعايل

نار قيامة

رقّعوها

ركّبوها

جتّة

جبّة

سمينة جقّة

و قادلة ملكة

نافخة لهدومها

و كضومها

"كلوشا" منقوش

راسها منكوش

صاحية يومين

دايخة شهرين

داخلة "كومها"

....................

أها

دي شني تبقى

يامطيميس

ود بلومة

..................

- ياخي دي سااااااهلة

ما ياها الحيكوووومة ؟!!

عطسـة ثانـية

الذاتيـــة:



"أنحنا زحفنا

وكل العالم ما بوقفنا "

استوردنا

حديد ياباني

استحسنّا

قمح نصراني

" اتسحسحنا "

لبان نرويجي

اتمسّحنا

" كريم " دانماركي

اتستّفنا

عذاب سوداني

اتقاسمنا

نبق ايراني

استوردنا

بخور اسباني

و استصحبنا

طلح براني

استحسنا

كلب امريكي

و استفضلنا

كديس بريطاني

استوردنا

خروف ايرلندي

واستعجلنا

" سماد " يوناني

استلهمنا

خطب من مالطا

و استصحبنا

ضمير "كوزاني"

.......................

استوردنا

تلج من كندا

واتدّينا

مدمس غاني

استنفرنا

سيوف من بورما

واستعجلنا

" كلبش " انساني

........................

اتعاقدنا

مدرب هندي

واستصحبنا

"شُراب " اوغندي

واستفضلنا

" كفر" صومالي



استحسنّا

قُلل كوبية

استوردنا

" فلل" بوذية

استصحبنا

تيوس تركية



اتهافتنا

قرود كينية

اتداولنا

" بِنس " روسية

استعجلنا

" ودك " الماني

آآآآه يا اااااني

استوردنا

قطن سوداني

......................

" فلنأكل مما نسمع

ولنطرح مما نجمع

ولنخمش مما نلبع

ولنسمن مما نلبع "

*******

" أنحنا ولاد

الجوع و المحنة

أنحنا الفقرا

و سرقوا قمحنا

خريفنا الرازه

وأحلامنا حرازه

مخاصمة سمحنا "

عطسـة ثالثة

الأغانــــي :

زمن الغُنا

" العولاق "

صبح الطرب

دقداق

حتى الاسامي

تميل





عشمانة غرب النيل

كوكو سن الفيل

كباشي ود صارقيل

....................





يا "مصنفات " حي ووب

يا " لجنة " قلنا الروب

ما سمعتو

" بت عنتيل " ؟!!

بتغني نص الليل

- ياشوشو لايف بوي

اركب عديل ركشة

يافقري ... ياشطة

نتلاقى في الكبري

شان نرسم الخطة

تمشي و تقابل ابوي

يا شوشو قرر

هووووي

.....................

يالجنة الاشعار

يالجنة الالحان

مافيش حقوق

انسان ؟ّّ!!

...................

انا اركب الدفار

اسمع " سماح ترعة "

اركب كمان تكسي

اسمع " خميس نقعة "

او افتح الرادي

يفلقني " بالمنقة"

اتحاوا بالتلفاز

القى العِمم واقعين

الربة زي تمرين

اتنين يغنوا انين

اللبعة باللبعة

والبادي " ود بنزين "

...........................

اصحا الصباح

نعسان

اقرا الجرايد اموت

امشي الشغل

مهموم

ضبلان تقول هلفوت

ادخل لجمر السوق

يبلعني زي الحوت

اشرب عصير ليمون

القا الغُنا الربراب

لاحقني بالدُراب

فالقني بالنبوت

..........................

ارجع لسجن البيت

افتح اذاعة " جيم "

القا المذيع طربان

من صوت

" منال برسيم "

ويسأل كمان

فرحان

" عن دور غُنا البنوت "

............................

انا امشي وين

لي وين؟!!

اطلب لجوء للصين؟!!!

عطســة رابعة

الدمــوع:

أنفلونزا الصقور

الشمس قَرَصَت

جلد حلتنا

في ساعة البكور

مُحُمد احمد

حك جلد احلامو

لي فول الفطور

....................

مسكين يا مُحُمد

هملان يا مرمًّد

يوماتي عليك

محموم فليل

يوماتي عليك

مغبون بالحيل

وسرسار الليل

تَف

تَف

تَف

تَف

ماسورة تنقط

من عينيك

اوصالك شاكية

هواجسك صاحية

تهِد الحيل

عينيك يا مُحُمد

زي شباك

ضلفاتو قزاز

تزلق في المطرة

بزفرة حسرة لسدر الشارع

وبال الخيل

آآآه يا مُحُمد غربال الراس

الليل وسواس

والغيظ خنّاس

والدنيا شراع

والوحشة شُراع

مفتول مجداف

ممكون في سيل

.........................

حاكمت خطاك

جادلت شقاك

لقيت اخترت

تشوف بعيونك

وما بسواك

دقيت طبلين

في الصّنة

الهاملة

صداهن رجَّ

الريح الخاملة

رشّاش صبَّ

جحيم في عضاك

عضيت في توب

الصبر الضيق

حلبت رضاك

في جوهّ اذاك

.....................

آآآآه يا مُحُمد

وصوك من قمت

تريد الرمضا

عشان تتعلم

كيف تتألم

تصحصح و تصحا

بدون ما تصرخ

و ترجا العون

تدُق الصنّة

وتبلع أنّة

تناجي الصاخة

تكون مجنون.

....................

وتزازي تجابد

ليل ... و بكور

كم ريس نضمو

وساقو المركب

غرقت و شربت

طين الخور

كم فالح طالح

جاكا يهرول

في غباش حدادي

في ليل مدادي

و قطع النور

وحسع جاتك

كفوة في عطسة

اخير العطسة

زكمة جديدة

سَرَت في الجو

ونزلت شَوْ

جابوها صقور

عطســة خامسة

الاتفــــاق:

حولاً تمام

من قالوا:

ابشر يا ولد

حسع خلاص

دغشك شرق

حولاً تمام

صاجك مرّْد

ياولد

ووشيهو ما صابح

طَرَقْ

.......................

صلح السواد

الاصلو ما فات

الورق.

عطســة سادسة

اعتـــداد:

جيبو الشُعراء

شُعراء السلطة

ولموا السَحَرا

كلّ السَحَرا

مُقَرَّم و أُسطى

....................

جيبو ردودكم

"ايميل"

سيل

لو بالايد

او بالبُسطة

قولو شعركم

وارمو حبالكم

وانحنا الشُعرا

ضمير الفقرا

رُسُل زي "موسى"

واصبْر كف

واخر ايد

مداها بعيد تجدع في الصف

..........................

حتلقوا "عصاتنا"

رتت لحبالكم

ولقفت كف

مكر السحرا

ونكرا الشُعراء

وحتى الامراء

وناس بيزنطة

وأُجرا السف

الشعر ضمير

ما لف او عك

والغامس قلبو

في حبر الشعب

ما باع لعذابو

براحة "كامري"

و رزم البنك

والشعب بصير

بالصاح و الحق

بالشق و الطق

بفقير او مك

و عارف صفُّو

و قاطع الشك.

...................





عطســــة سابعــة

توكــــــل :

اتوكلنا عليك

يا الله

بكرة بنمرق

كلنا برة

من كل مدينة

من كل حواري

من كل حلة

بكرة بنمرق

كلْ خلق الله

ما نخلي منافق

طار بالزانة

ما نخلي معولق

داسنا أذانا

ما نخلي الباعو

النيل و هوانا

ما نخلي العقروا

لناقة صالح

وحشو وريدها

وبالجبخانة

...................

اتوكنا عليك

يا الله

بكرة بنمرق

كلنا برة

نقوقي نصفق

للحرية

غُبننا كاسر

مية المية

ندوس الكاتل

والف سرية

نقلع حقنا

بالزندية



عطســـة ثامنــة

نمّـــه :

لا مديت

ايدين حلمك

على المحظور

لا ظنيت

عشان وجعك

تقيف الدنيا

تابا تدور

ولا كسرت ناي شوفك

على المستور

لا سامرت بي حزنك

ندم "ياريت"

لا يوماً

على حالك

رتيت حنّيت

قَلَدت شقاكا

يا مسكين

على نارك

دَلَقْتَ الزيت

ولا خابت

عيون وجعك

ولا سمعك

ختاهو النور

عطسة تاسعة

توقيع:

عميان و شايف

غبيان و عارف

بريان و نازف

عشمان و خايف

.......................









مالي زى شدراً

سكن بال الخلا

اخضر و ناشف؟!!!

اعذريني

أصلي ما بعرف

شنو الفرح

الموالف

إلا بس...

لهب المسارب و المواقف.

...............................




هــاشم صديـق

11/2/2006م
[/center]
الرجوع الى أعلى الصفحة اذهب الى الأسفل
 
انفلونزا الصقور
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات الترتر اون لاين :: القسم الثقافي :: المنتدى الادبي و الفني-
انتقل الى: